نهر الأعوج ..بقلم /د. ملك الاصفر

قصيدة باللهجة العامية ...
بعنوان ... نهر الأعوج ...
....................................
نهر الأعوج بالكسوة
وبيسقي أراضيها
شكلو متعرج ياعين
وللكسوة بغذيها
وبساتينا الحلوة كتير
بمياهو عم يرويها
تاتنبت فيها الأزهار
وبألوانا تحليها
...................
نهر الأعوج حلو كتير
وعالضفة القعدة حلوة
شوتمشينا نحنا صغار
وغنينا أحلى غنوة
وقعدنا بفي الأشجار
والشمس نورا يضوي
وخضنا ولعبنا بالمي
والمية صوتا يدوي
...................
نهر الأعوج يا سلام
بعدو عايش بقلبي
وذكرياتو حلوة كتير
حلم وألوانو وردي
شقائق زهر النعمان
لونا أحمر ومندي
وعالضفة حبق وريحان
وعصفورة توقف حدي
....................
عالأعوج شو تصورنا
وقطفنا باقات زهور
تسابقنا مع الميات
وركضنا مع العصفور
ووقفنا بفي الغيمات
وكتبنا على شجر الحور
وشو كانت حلوة الأيام
وشو كان القلب مسرور
..................................
د. ملك محمود الأصفر