مُش رَاجِع ـــــــــــكلمات الشاعر أحمد شاهين
- مُش رَاجِع
- ـــــــــــــــــــــــــــــــــــــــــــــــــــــ
- وَانَا اللي بَشُق طَرِيقِي بِين الامْوَاج
- وِبَاجِـي كَتِير عَلَى نَفْسِـي وِبَتْحَمِّـل
- وِبَانْيَــه ســــــدُود مَا بِنَّــا سِيَـــــاج
- وَانَا المَصْلُوب عَلَى بَابِــك وِبَتْأَمِّل
- عَشَـان تِرْضِــــي وِمَــا بْتِرْضِيش
- وِسَــــــايْقَه التُّقــــــل بِتْكَمِّــــل
- وَانَا اللي بَشْقَى عَشَان خَاطْرِك
- وَانَا اللي مَالِيش خَــاطِر عَنْدِك
- بِتَاخدِي مِن قُــوتِي وِتِدِّيهُم
- وَانَا اللي بِكْتَافِي أنَا سَانْدِك
- فَلَمَّا ازْعَـل .. مَا تْلُومِنِيش
- وِلَمَّا أرْحَـل .. مَا تِدَّايقِيش
- مَا انَا المَظْلُوم أكِيد عَارْفَه
- وِهَعِيــش ازَّاي مَا بِين خَفَــــافِيش
- ضَيَّعْتِي مِنِّي الحَبِيبَه عَشَان فَقْرِي
- وِضَيَّعت عُمْرِي وَرَاكِي وَانَا بَجْرِي
- يَا بَلَدِي اللُّقْمَـــه بَطْفَحْهَا مَا بِتْكَفِّيش
- هَفْضَل لإمْتَى أنَا اتْحَمِّل ؟!
- يَا أفْوَاه بِتُصْرُخ مِ الوَجَع
- وَلاَ لُقْمَه رَايْحَـه لِلبُطُون
- دِي قِصَّه بَرْضُو تِتْسِمِع
- وِنَاس بِتِمْلَى بِالجَــــالُون
- يَا بَلَدِي الحُزن حَاضِنِّي وِقَاسِمْنِي
- وِحَتَّى الفَــرْح فَارَقْنِي وِخَاصَمْنِي
- وِالدَّمْعَه شَقِّت فِي الخُدُود طُرُقَات
- وِبَعْدِ الصَّبْر غِيرُه مَافِيش
- هُمَّا كِلْمِتِين
- يَا وْلاَد بَلَدْنَا الطَّيِّبِين
- حَال اللي قَــاعِد هِنَا
- دَه يِرْضِي مِين ؟!
- أنَا مْسَافِر أنَا مْهَاجِر
- مَا دَام بِنِحْلَم وِبِنْعَافِر
- مَا دَام حِلْمِي مَاهُوش كَافِر
- مَا دَام أرْضِـي مَا بِتْشِلْنِيش
- مَا دَام مُش لاَقِي حَتَّى أعِيش
- أنَا مْسَافِر أنَا مْهَاجِر
- وِمُش رَاجِع
- ــــــــــــــــــــــــــــــــــــــــــ
- كلمات الشاعر أحمد شاهين
- ----- مصر - أسيوط -----
ليست هناك تعليقات:
إرسال تعليق