لسّة مستنيكى فى محطة مسرّة ... شعر رفعت المرصفى

• لسّة مستنيكى فى محطة مسرّة ... شعر رفعت المرصفى
• ---------------------------- 
• 1-
• معقول هشوفِكْ تانى زىّ زمــانْ ؟
• واقوم الصّبحْ ...
• والبسْ لكْ الطّقم اللّى بتحبّيهْ
• واستناكى فــ محطة مسرّةْ
• وعلّق عينياّ عــ الشارع الخارجْ من ميدان السوقْ
• ويهل طيفكْ المسكونْ ... بشـــوقْ
• ونركب" الطلَبَه"
• ونِجرى عـــ الكُرسى الأخيــرْ
• ونفرِد الحِلم الكبيرْ...
• معقول هـ أقبلكْ تانى فــ " علوم" (1)
• وفـْ مدرج حقـــوقْ ...اللىّ فوق (2)
• وعلى " محطة الجامعة"
• وفــ ضِل" قصر الزعفران " ؟
• معقول هـ أقبلكْ ... بعد ماشاب الكلامْ
• والله العظيم ... أنا مُمكن اعملْها بصحيحْ
• وأقوم الصبح ... زى زمــانْ
• والبِسْ لكْ الطقم اللىّ بتحبّيهْ كَمانْ
• واستناكى فــ محطة مَسرّة
• وعلّقْ عينيا عــ الشارع الخارج من عَبيركْ
• واستنّى طيفِك المسكون بشوقكْ
• واركبْ لكْ "الطلبه" 
• واحجزْ لِكْ الكُرسى الأخيرْ
• بس السؤال المستحيلْ ...
• ياهل ترى المشهدْ هيكملْ وتيجى بجَدْ ؟
• واللاّ الأتوبيسْ هـ يْمشى
• ويسيب عينيا متعلّقةْ
• عــ الشارع الخارج من ميدان السوقْ 
• مِستنى طيفكْ المسكووون بشوقْ
• ياهل ترى المشهدْ هيكملْ وتيجى بجدْ؟
• واللاّ الأتوبيس هـ يزهَقْ ...
• ويدوس على الحِلم القديم الجديدْ
• واللّى رافض يمووووتْ؟
• واللىّ لسّه مستنيكى ... 
• فـــ محطة مَسَـّـرةْ !!!
• 2-
• معقول هـ اجيلكْْ تــانى زىّ زمـان ...
• والبِسْ لِكْ الطقم اللىّ بتحبّيـــهْ كمانْ
• وشاِورْلكْ من تحتْ / وانا بينى وبينكْ ...
• مش أكتر من مية وخمسين نبضـةْ
• وفــ وسط النور الفرحان الملمـــوم حواليكـــى
• أبعَتْ لِكْ دقات القلب تبوسكْ وتجينى
• وبسرعةْ ... أخد " التروماى"
• واطلعْ ْلكْ ويــّـاه الكوبرى المحظوظ الساكن قُدامكْ
• وابقى فـ نص الكوبرى تمام
• وقريّبْ جدا جدا من بلكونتِكْ
• وبسرعة تسهّينى عيونى ...
• وتنط من الشباك .... وتروحلِكْ
• وتبوس السوووور المسنودةْ 
• بأْدِيكى عليهْ
• والله العظيم ... 
• أنا ممكن اعمِلْها بصحيحْ
• وأجيلكْ تــانى زىّ زمـان ...
• والبِسْ لِكْ الطقم اللىّ بتحبّيـــهْ كمانْ
• وشاِورْلكْ من تحتْ / وانا بينى وبينكْ ...
• مش أكتر من مية وخمسين نبضـةْ
• واخد التروماى اللّى شالوه دلوقتى
• واطلعْ لكْ ويـــّـاه الكوبرى
• المحظوظ الساكن قُدامكْ
• وابقى فـ نُص الكوبرى تمام
• وقُريّبْ جدا جدا من بلكونتكْ ....
• بس السؤال المستحيلْ ...
• ياهل ترى المَشهد هـ يِكْمَلْ ...
• والئْاكى حاضنة السوووور... وبتشاوْرى ... ؟
• واللّا ... زىْ ماشالوا الترُّوماى
• وشالوا وراه السوق
• هلاقيهُمْ ... شالوا كمان بلكونتِكْ !!! 
• -------------
• 1- كلية العلوم
• 2- كلية الحقوق
• من ديوان " لسّــه مِستنيـكى " لـ رفعت المرصفى