حكاية وَلَدْ ... ميّتْ وراجِعْ يتْوَلَدْ ... صورة شعرية لـ رفعت المرصفى *

• حكاية وَلَدْ ... ميّتْ وراجِعْ يتْوَلَدْ ... صورة شعرية لـ رفعت المرصفى *
• --------------------------------
• تعالوا نِرْجَعْ للغُلافْ
• مرسوم عليه صورة ولـدْ
• نايم فـ حُضْنِكْ من زمان 
• وجْدوره لابدهـ فـ الغيطانْ
• لكنْ فروعهْ ..عـ البنادر ضّللِتْ 
• والعُقد لمّا بينفرطْ 
• حبّاته لازم تتلضمْ 
• لو حتى تاهت للأبد 
• وهُو حبّه منّكْ يا بلد 
• فاتت سنينْ .. 
• وكبِرنا حبّه 
• وبقينا إيه .. متعلمّين – متنوّرين
• نفهمْ كتير فى الدندنةْ 
• نحفظ أغانى " العندليب "
• وأغانى " سومه " المدهشةْ 
• " وُلِدَ الهُدى ... وحُب إيه 
• هوّ صحيح – فات الميعاد "
• كُنّا حكايات ....
• متوزعةْ بين السطور
• وِسْط الغيطان والوشوشة ْ
• كُنّا حكايات ... 
• فوق الشِّجرْ مِتْنتوَرةْ 
• زىّ الطيورْ نِجمعْ فـ شهد الطيّبين 
• يُحضُنّا جِسر " المَدْوشةْ " ( 1)
• ورغم طول الدردشةْ ... والفرفشةْ 
• ولا وقت فاتنا فـ الصّلا 
• كانت وِدَانّا بالآدان متعلقهْ
• كنا طيورْ.... ديما بيحْلَى لها اللُقا
• متوشحين بالحِلم الاخضرْ بين الغُنا والزقزقةْ
• وعشان حدود العمر أكبر مـ اللىّ فاتْ
• وعشان ليالى الحِلم ضفّرها السُّكاتْ
• وعشان آهاتْ من غير آهاتْ
• القلبْ سافرْ ..... 
• والقَطر صفّرْ بالساعات
• والشُّنطْ فوق عـ الرفوف .... متوجّعَةْ
• والغُربة خطّتْ عـ الجبين ْ
• أحداث كِتيرهْ مولّعةْ
• وتروُحْ دموع .... وتعُود دموعْ 
• ويمُر ليل الغُربة فوق جسر الضلوع
• فوق العيون المشتاقينْ لحظة رجوع 
• فوق العروقْ الملْيانين صبر وجَلَدْ 
• وفْ نشوةِ العِشق الأشدْ 
• رِجِع الولَدْ ... ميِّتْ وراجعْ يِتْوَلَدْ 
• لفّاهْ عبايه معطّرةْ
• كِتـــــاااااااااب .... ولازم ينقَرَا
• والله عليك يا زمان الطيّبين
• يا للى انتهيت 
• وما عادشى منّك إلا ريحة الذكريات
• وما عادشى منّك 
• إلا حرف بنرسمه زى السُّكاتْ 
• يمكن يعيش / يمكن يموت
• يمكن فـ يوم ينطلق برّا التابوت
• ويقوووووول ......حاجات
• -----------------------------------
• * من ديوان - يازمان الطيبيين " لـ رفعت المرصفى - بالعامية المصرية
• 1-المدوشة : جسرفى مدخل قريتنا مرصفا من ناحية قرية ميت كنانة كنا نلتقى فيه دائما عندما كنا صغارا