قريت ديوان عينيكي ** بقلم صبري علي

• ** ديوان.
• (1)
• قريت ديوان عينيكى ' م الجّلدة للجّلدة..
• أقول لروحى:" مهلك",ولقلبى:"بس اهدى"..
• بين السطور كانت' كلّ الحروف' شاهدة.!
• إن الرموش تسحر, وانّ الجفون' ساهدة.
• (2)
• كان الغلاف رقيق ..مكتوب عليه إسمى..
• سحر بحقّ, وحقيق .. فين لمّا تبتسمى.!
• زىّ ما كنت ف عينيكى دايما باشوف رسمى.
• (3)
• أوّل قصيدة قريتها .. قصيدة الننى..
• كانت جميلة الصّور , والوصف جنننّى.
• قريتها ميت مرّة ' حبيبى اكمنّى..
• شايلك فى ننّ العين, وهمّا شايلينّنى.!
• (4)
• أمّا قصيدة الجفون ' قصيدة حنيّنة..
• كفّين حاضنين أمل ' عمره يا دوب سنة.!
• عالم فسيح وراها ' مليان سحر , وهنا..
• (5)
• أمّا عن الرموش ...مقدرتش اقراها..
• كانت شمس الشّموس' بتبصّ لى وراها.!
• مقدرتش افتح عينيّة' من نور محيّاها.!
• (6)
• أمّا قصيدة الدّموع ' مقدرتش اوصفها..
• زىّ ما تولع شموع ' النّار .. بتكشفها.!
• ولمّا الضّوء يروح...يفضل يا دوب طيفها.
• (7)
• وامّا قفلت الديوان..غمّضت عيني, ونمت..
• حسّيت ساعتها إنّه ..قلبى بدأ يهدى.
• صبري على