خلينا في مركب ياوطن ..للشاعر/ وائل عمر

-----------------------خلينا فى مركب يا وطن........ موديانا فين أبعد من كدا قطر بيتحرق وكام مركب غرق وعيون أهلك خلاص أدمنت البكا راح بينا فين يا وطن .؟ عمال تدوخنا لتموتنآ يا وطن يا إما تجرحنا! فكر مره يا وطن أنك تفرحنا دا العمر فيك اتسرق والحزن منا اشتكا ألمى كان زمان كنت اعرف له مكان كان فى القدس وخلاص أما خلاص الأن عمال اصحى وانام على صوت أنين وأحزان فى كل ركن فيك قلوب متنكده عدوى كان زمان كنت عارفه تمام وكنت اصحا وانام بفكر فى انتقام لقلوب متعذبه لموت دره و وفاء وغيرهم كام شهيد دلوقتي عدوى مين واخد بتارى فى مين واخد بتاري منين واخده كمان من مين اخده لمركب غرق ولا لقطر اتحرق ولا لعمرى اللى اتسرق اخده فى خالد سعيد ولا لعمار فى سوريا اوعى تقولى يا وطن ايه ذنبي فى اللى بتحرق وما لى ومال اللى غرق عارف لو قلت فى يوم كده ما أنت خلاص قلت كده آخر حلاوة سكرك هتوه فى مر حنضلك مش طايق أشوف منظرك وأنت كده عشان كده عمرى ما خفت من الغرق ايه الغرق غير لما أكون عندى خلاص تلاتين سنه لسه بدور على العمل ايه العمل من غير عمل ايه الغرق غير لما أكون عندى خلاص تلاتين سنه لا عندى شقه تلمنى ولا ليا زوجه تجيبلى ابن يكون سند وأصبح وابات رأسى م الفكر هتتفلق ايه الغرق غير لما أبويا يعيش حياته سنين عجاف ويقول خلاص ابنى كبر هيكون سند ويلاقيني لسه عليه أنا بتسند كل دا و تقولى اخاف من الغرق ما اللى ما كانش ف مركبى ركب فى قطرك و اتحرق واللى ما غرق واتحرق قوت ولاده بتسرق أو تحت أنقاض المبانى بيندهس زى الورق وتانى بعد كل دا يوم ما أنجى م الغرق جاي تحاكمنى عملت ايه اخترت أكون عايش وعايش يا إما أكون ميت وميت أحسن ما أكون ميت وأنا على رجلى ماشى جاى تحاكمنى يا سيدى ماشى أنت اللى صنعت مركبين عملت واحد للغلابه الشقيانين و واحد للى فلوسه يامه واحد بيغرق والتانى يوصل بالسلامه مركبنا مركب الغلابه الشقيانين الغرقانين كان نفسى توصل بالسلامه إما انتوا يا اللى فلوسكوا يامه جايه من دم الغلابه الغرقانين الشقيانين التعبانين هى اللى عايشه بسلامه بعد دا كله جاى تحاكمنى يا سيدى ماشى وحيات عذابى هاحكمك أنا يوم القيامه آه يا وطن كان نفسى توصل بالسلامه (......وائل عمر )